CEBU, Philippines - Gituohang pangabubho ang hinungdan sa paghikog patay sa 40-anyos nga lalaki pinaagi sa paghigot og pisi sa liog sa Cansubing, Buagsong, Lungsod sa Cordova alas 8 sa buntag kagahapon.
Ang 12-anyos nga batang babaye nga silingan maoy nakadiskubre sa patay’ng lawas nga nagbitay sulod sa ilang panimalay.
Si Police Officer 1 Cecilio Retuya sa Cordova Police Station niila sa namatay nga si Roderick Ricamadas, nagpuyo sa maong dapit kinsa giingong alas 10 pasado sa niaging Domingo sa gabii gikalalis niini ang kapuyo.
Matud ni Retuya nga gisukmatan sa namatay ang kapuyo labot sa nahipos niini nga tabi-tabi sa ilang silingan nga aduna kini laing uyab.
Laing naghikog patay ang 15-anyos nga tinun-an sa Grade 10 sa Lungsod sa Tabogon.
`Matud ni PO1 Alvin Pepito sa Tabogon Police Station nga niadtong Huwebes wala mosulod sa iyang klase ang tinun-an hinungdan nga gikasab-an kini sa iyang inahan.
Ang silingan sa namatay nga si Astrophel Agosto, 41, maoy nakadiskubre sa patay nga lawas sa 15-anyos nga nagbitay ilawom sa kahoy gamit ang pisi.
Ang inahan nitug-an sa mga polis nga walay kontra sa ilang tunghaan ang iyang anak.
Katapusang nakita nga buhi ang batan-on niadtong nakalabay nga hapon human kini nanguha og kahoy para sugnod ug pagkabuntag nakita na lang kini nga patay na.
Posibleng nangluod ang 15-anyos human kini nakasab-an. (BANAT NEWS)