CEBU, Philippines - Kuwarta nga nagkantidad og P300 mil ug ubang mga gamit nadagit sa wala mailhing mga kawatan nga nilungkab sa usa ka balay diha sa Brgy. Talamban ning Dakbayan sa Sugbo.
Igo na lang pagdangop sa kapolisan si Dale Tudtud ug gipahibalo nga gilungkab pag Hunyo 21 sayo sa buntag.
Si Daphnee Aznar, 23, anak sa tag-iya, taga Tudtud Compound sa Brgy. Talamban, nanawag sa Talamban Police Station ug nagpahibawo kini sa kapulisan sa maong insidente.
Matud pa alas 5:30 sa buntag nabantayan sa katabang nga abli na ang bintana sa kwarto sa iyang mga amo.
Base sa imbestigasyon sa pulis, niagi ang mga kawatan sa koral ug gituyo og guba ang bintana sa kwarto.
Gikuha ang kwarta nga nagkantidad og P300 mil ug mga importanting dokumento, stereo, mga alahas ug mga relo.
Matud ni Police Officer 1 Gringo Muldez, desk officer sa Talamban Police Station, nahinabi sa Banat News padayon pa ang ilang imbestigasyon sa kaso. (BANAT NEWS)