CEBU, Philippines - Gibutyag sa Environmental Management Bureau (EMB)-7 layo ra ang posibilidad nga magka-oil spill sa Monad Shoal sa Isla sa Malapascua, Lungsod sa Daanbantayan human sa pagsangad sa barko nga M/V Belle Rose.
Matud ni Engineer Cindylyn Pepito-Ochea, pangu sa Ambient Section sa EMB-7 nga nahinabi sa Banat News giadto nila ang Monad Shoal aron pagsiguro nga dili magka-oil spill sa dapit.
Matud pa niya, ilang nasuta nga ang tangke sa krudo sa maong barko anaa gibutang sa ibabaw nga bahin ug ang nabuslot mao ang tangke sa tubig nga ang sud tubig sa dagat, matud niya mao kini ang bag-ong desinyo sa mga barko karon.
Ang officer-in-charge sa Provincial Environment and Natural Resources Office (PENRO) nga si Baltazar Tribunalo nanawagan sa kompaniya sa M/V Belle Rose nga dili lang una irogon ang maong barko. Ang maong barko nagkarga kini og 48,000 metric tons nga clinker gikan sa Japan paingon ngadto sa Lungsod sa San Fernando, sagol ang clinker sa paggama og semento ug ihatud unta kini ngadto sa Taiheiyo Cement Philippines, Inc.
Matud pa nga ang maong barko nga gimaneho ni Capt. Vicar Niel De los Reyes giingong milikay sa mga mananagat nga nanagat hinungdan nga nasangad kini ngadto sa nahisgutang coral reef nga usa ka protected area. Kagahapon si Tribunalo mipadayag sa iyang kabalaka nga kung walay makabantay irogon unya ang barko ug mograbe na hinuon ang mahitabong kadaot, mikabat og kapin tulo ka ektarya sa coral reef ang nagusbat niini.
Nabantayan usab nga adunay tug boat nga mitapad sa maong barko ug giingong giirog niini ang nahisgutang dakung barko. Si Tribunalo mipadayag nga mopasaka sila og reklamo batok sa maong barko ug sa kompanya niini.
Ang giladmon sa mga gasang diha sa lugar nahimutang sa 10 ka metros ug ang giladmon sa giplantsa sa barko miabot sa 12 metros. Ang maong barko duna kini gibug-aton nga 50,472 metric tons.
Lakip sa nadaot o nangagupok ang mga dagku kaayong gasang o boulders hinungdan nga ang barko nakabaton kini og upat ka mga lungag sa ilawom nga bahin niini dapit sa atubangan.
Hinuon giingong ang maong barko bag-o kini nga modelo ug ang bunker fuel niini nahimutang sa 3rd level apan bisan pa niini gibantayan ang posibleng oil spill.
Gawas sa insidente sa Monad Shoal lakip sa gisusi sa EMB-7 ang gikareport nga nahitabong oil spill sa Sapangdaku sa Dakbayan sa Toledo ug sa Pescador Island sa Lungsod sa Moalboal.
Nagkanayon si Ochea, niadtong adlaw’ng Martes nagkuha sila og sample sa oil spill sa Toledo City ug gilauman nga mogawas ang resulta karong adlawa.
Matud niini, kritikal ang kahimtang sa dapit tungod kay sumpay ra man kini sa Tañon Strait nga usa ka Protected Seascape. Kun mogawas na ang resulta mao kini ang ilang basehan sa sunod nga aksiyon nga himuon ug ilaha kining iduso sa Protected Area Management Board ug sa Local Government Unit.
Nalipay hinuon ang EMB-7 kay dili dako ang problema sa oil spill sa Moalboal tungod sa dinaliang pagtinabangay sa mga tawo didto paglimpyo ug paghaw-as sa lana nga naglutaw sa tubig aron masalbar ilang kadagatan.
Hinuon, bisan pa man og nakita nila nga limpyo na ang dagat apan gusto gihapon nila maneguro maong mikuha gihapon sila og sample. Giangkon sa EMB-7 nga hangtud karon wala pa gyud sila masayod kun kinsa ang responsable sa nahitabong oil spill sa duha ka lugar.
Gipasabot ni Ochea, dako gyud og kadaot nga mahatag ang oil spill ilabi na diha sa Tañon Strait nga daghan og endangered species gumikan usa man kini ka toxic chemical. (BANAT NEWS)