CEBU, Philippines - Dili pa matino sa Department of Interior and Local Government kung makabalik na ba si Dalaguete Mayor Ronald Allan Cesante gikan sa iyang pagkasuspenso human siya nasublian sa niaging eleksiyon.
Matud ni DILG provincial director Jerome Gonzales nga mokonsulta una siya sa ilang abogado bahin niini. Ang Ombudsman-Visayas nisuspenso kang Cesante sulod sa unom ka buwan sugod niadtong Abril gumikan sa kasong graft.
Si Gonzales nagkanayon nga gitangtang na sa Korte Suprema ang Aguinaldo Doctrine nga maoy taming sa mga piniling opisyal nga makalingkawas sa kaso kung masublian sa pagkapili sa rason nga gisaligan gihapon siya sa katawhan.
Dugang ni Gonzales nga wala siya kadawat og order gikan sa Ombudsman kung ipapadayon ba ni Cesante o dili ang iyang pagkasuspenso. (BANAT NEWS)