CEBU, Philippines - Mokapin usa ka milyon ka pesos nga kantidad sa mga alahas ug kapin sa P200 mil nga cash ang nadala sa mga kawatan nga migamit pa og acetylene paglungkab sa upat ka mga establisamento lakip na ang usa ka pawnshop diha sa Brgy. Cansaga sa Lungsod sa Consolacion kagahapon sa buntag.
Ang Agnes Faller Building maoy gisulod sa mga kawatan pinaagi sa pagbungkag sa sementadong bungbong sa likod niini dayon misaka ang mga kawatan sa kisame hangtud nga nakasulod sa upat ka mga establisemento, Reshelles Botique, Pencarich Lending Corporation, Express Day ug BG Ermac Pawnshop nga gipanag-iyahan ni Konsehal Ben Ermac sa maong lungsod.
Sulod sa maong building bugtong ang dental clinic lang ang wala gisulod sa mga kawatan.
Ang hepe sa Consolacion Police nga si Sr. Insp. Wilson Abot nga nahinabi sa Banat News nagduda nga posibleng dili organisadong grupo ang milungkab sa mga establisemento ug dili kini grupo sa mga notadong acetylene gang.
Matud pa ni Abot nga nagdala lang og acetylene ang mga kawatan kay mao kini ilang gigamit sa pag-abli sa vault sa pawnshop. Nakuha sa mga kawatan sulod sa pawnshop ang daghang alahas nga mikantidad og P1, 081, 050, ug cash nga P196, 856.
Samtang nalimas usab sa mga kawatan ang P40 mil gikan sa Pencarich Lending Corporation ug P8 mil gikan sa Express Day.
Si Abot miingon nga walay guwardiya ang maong establisemento apan adunay close circuit television (CCTV) ang pawnshop, apan ang CPU sa CCTV gi-apil og dala sa mga kawatan.
Sumala pa ni Abot nga niadtong nakalabay nga tuig nabiktima na sab sa lungkab ang maong establisemento ug didto ra gihapon miagi ang mga kawatan ug mga sapatos lang kaniadto ang nakawat.
Gitambagan ni Abot ang tag-iya sa maong establisemento kaniadto nga magbutang og guwardiya apan wala daw kini naminaw.
“Dugay ra ku nagsige og istorya nila nga magbutang lagi og guwardiya wala gyud naminaw, ang pawnshop wala gani alarm system nga makatabang unta og maayo especially kung ingon ani nga event”, saysay pa ni Abot.
“Pwerteng humoka sa bungbong sa likod, halos walay kabilya, pwerteng sayona pagsulod sa mga kawatan didto ra gihapon miagi sa kisame, ang CCTV wala nagamit kay sa gawas ra man gibutang sa pawnshop unya kay sa sulod man miagi ang mga kawatan,” dugang pa niya. Plano karon niya nga tukion kini sa umaabot nga panagtigom sa mga bag-ong mga opisyal sa lungsod.
“Walay organized group nga modala og CPU sa computer, local boys ra ni,” sigun pa ni Abot. Jojo C. Ugdol ug Romeo Limpangog (BANAT NEWS)