CEBU, Philippines - Bawion sa Kapitolyo ang tanang sakyanan nga anaa sa mga piniling opisyal karong Hunyo 30 alang sa imbentaryo.
Matud ni Siegfred Jone Sepe, pangulo sa Provincial General Services Office, nga igo lang sila mohimo og physical inventory ug accounting sa mga sakyanan.
“Naay turnover sa katong mga mohawa, mag-inventory ta ana, mag-accounting and then sakto ra na sila, hatagan nato sila og clearance, once nga naa nay clearance mag-assign na pud ta sa mga equipment, vehicles and personnel nga ma-assign sad sa ila,” matud ni Sepe.
Sa 14 ka sakop sa Provincial Board, siyam ang mohawa ug lima ang nagpabilin sama sa pangulo sa Association of Barangay Councils nga si Bokal Celestino “Tining” Martinez III.
Gitan-aw karon kun bag-ohan ba og sakyanan ang sakop sa PB sanglit adunay duha nga madugang gikan sa ikapitong distrito.
Si Gobernador Hilario Davide III sa iyang bahin nagkanayon nga ilang susihon kung may budget alang sa pagpalit og sakyanan.
Samtang si Provincial Budget Officer Danilo Rodas nagkanayon nga adunay P40 milyones nga pundo alang sa sakyanan ubos sa buhatan sa gobernador nga mahimong magamit kun madayon ang pagpalit og mga sakyanan alang sa mga sakop sa PB. (BANAT NEWS)