CEBU, Philippines - Mipirma na usab og laing memorandum order si acting mayor Margarita Osmeña kagahapon aron magtudlo og 19 ka mga kawani isip iyang mga special assistants gikan sa nagkalain-lain nga departamento sa city hall.
Matud ni Osmeña nga ang mga gitudlong special assistants moserbisyo lamang kutob sa Hunyo 9 sanglit hangtod ra usab sa Hunyo 8 ang election ban.
Si Osmeña miklaro nga walay otoridad ang maong mga special assistants nga mohulip sa mga department heads ug dili usab sila mamahimong mopirma sa bisan unsa hilabi na karon nga daghan ang mipahimulos sa ilang vacation leave.
Magsilbi lamang sila nga taytayan ngadto kaniya ang maong mga special assistants matud ni Osmeña.
“I made that very clear they cannot take over kay they have no authority and I do not have the authority to give them the authority to take over, it’s very clear in the memo,” dugang ni Osmeña.
Miangkon si Osmeña nga sa ingon niini nga paagi mamahimong sayon para kaniya ang pagpakigtabi sa mga department heads ug nga masigurado niya nga giimplimentar gyud ang mga direktiba nga ilang nasabotan.
“We will do things properly again. A question of trust, we trust these people now designated as special assistants,”pasabot ni Osmeña.
Matud ni Osmeña nga nakigtagbo na siya sa mga department heads sa miaging adlaw ug nagpasalamat siya nga mitunga sila.
Sa laing bahin, wala mahinayon ang regular nga sesyon kagahapon sanglit gikanselar kini ni acting vice-mayor Lea Japson tungod kay uwahi niya nadawat ang memo nga gikan sa Department of Interior and Local Government-7 nga nagtudlo kaniya sa maong posisyon.
Si Japson ug laing nahibilin nga konsehal nga si James Cuenco buot mangayo og legal opinion gikan sa DILG kung mamahimo ba sila nga makapahigayon og mga sesyon bisan og upat na lang sila ka konsehal nga nahibilin human ang 12 nila ka mga kauban nasuspenso uban ni Mayor Michael Rama.
Samtang si Atty. Aiza Nogra, DILG-7 legal officer nagkanayon nga iyaha unang pangitaan og opinyon ngadto sa central office.
Apan siya miingon nga adunay opinyon ang DILG niadtong tuig 2012 nga mikonsiderar sa nahibiling mga opisyal isip mao nay quorum aron makapahigayon sila og sesyon.
Hisgutan unta sa regular session kagahapon ang 2016 revised annual budget sa dakbayan. (BANAT NEWS)