CEBU, Philippines - Mokabat sa P35,000 nga cash ang nadala sa mga armadong tulisan human ilang gitulis ang usa ka delivery van sa Mighty Corporation diha sa lungsod sa Medellin niadtong nakalabay nga udto.
Ang mga biktima giila nga sila si Chary John Parcia, 40, salesman, Jiemar Balansag, 24, helper ug Juanmar Singuran, 33, drayber sa van.
Sumala pa ni Senior Police Officer 1 Ryan Castro sa Medellin Police nga nahinabi sa Banat News nga posibleng gitiman-an nang daan sa mga tulisan ang rota sa maong delivery van.
Matud pa ni Castro nga sakay sa usa ka XRM nga motorsiklo ang tulo ka mga tulisan nga wala nagtaptap sa ilang mga nawong ug ang drayber ang igo lang nagsuot og kalo.
Alas 12 :50 sa udto sa dihang naghatod og mga produkto ug nangolekta usab og bayad ang salesman diha sa Sitio Graje, Medellin kalit lang naabot ang motorsiklo sakay ang tulo ka mga tulisan.
Ang tag-iya sa tindahan nga nahinabi sa kapulisan nagkanayon nga samtang nag-andam sa paghatod og sigarilyo si Parcia kalit lang misulod sa tindahan ang armadong tulisan ug gipangayo ang sling bag niini.
Human nakuha sa tulisan ang sling bag gidala siya paingon sa delivery van dayon silang tulo gipasulod sa storage compartment ug gipadlakan.
Nakagawas lang sa delivery van ang mga biktima human nga ilang gipatiran ang pultahan apan wala na diha ang mga tulisan.
Dako ang pagtuo ni Castro nga dili taga Medellin ang mga tulisan ug gisundan lang ang mga biktima ug nakakita og higayon sa ilang lungsod.
Nagpadayon ang gihimo nga imbestigasyon sa Medellin Police aron sa pag-ila ug pagsikop sa mga responsable. (BANAT NEWS)