CEBU, Philippines - Gibasura sa Sandiganbayan Second Division ang kaso’ng graft and corruption batok ni kanhi Government Service Insurance System president ug general manager, Atty. Winston Garcia, labot sa pagpili sa Union Bank nga maoy mopatuman sa E-Card project.
Lakip sa gipakawalay sala sa korte ang kaubanan ni Garcia sa GSIS nga sila si Enriqueta Palma Disuanceo, Benjamin Tolentino Vivas, Hermogenes Diaz Concepcion, Elmer Topacio Bautista, Fulgencio Factoran, Florino Ibañez, Aida de Castro Nocete, Reynaldo Palmiery, Ellenita Tumala-Martinez, ug Leonora Vasquez-De Jesus.
Gihangop ni Garcia ang hukom nga una na niyang gihulagway nga dili makabarug ug mismo ang Sandiganbayan na karon ang nisulti.
Matud sa korte nga gilapas ang katungod sa mga akusado alang sa dinaliang husay sa kaso ug walay nalapas sa pagpatuman sa proyekto.
Nasayran nga ang kaso batok ni Garcia ug kaubanan giduso niadto pang Abril 1, 2005 apan human pa sa kapin sa napulo ka tuig una pa gisang-at sa Ombudsman ngadto sa Sandiganbayan.
Nasang-at ang kaso niadtong Septiyembre 12, 2015 human nitumaw ang taho sa pagdagan ni Garcia sa pagka-gobernador sa Probinsiya sa Sugbo.
“The court rules that on the ground alone of violation of speedy disposition of the case, this case ought to be dismissed outright,” matud sa Sandiganbayan.
Mismo ang Sandiganbayan nihangop sa E-Card project nga gipatuman ni Garcia sa GSIS hulip sa naandan nga tseke sa pagdawat sa mga benepisyo sa mga kawani sa gobiyerno. (BANAT NEWS)