CEBU, Philippines - Nadakpan sa mga sakop sa Provincial Intelligence Branch sa Cebu Provincial Police Office ang siyam ka tawo atol sa pagpangronda sa Cambuntan, Bolinawan, Dakbayan sa Carcar, pasado alas 8 sa nakalabay nga gabii.
Lakip sa siyam ang target sa kapolisan nga si Liza Anquilan kinsa giingong notado’ng tigpayuhot og drugas sa mao’ng dapit.
Sumala pa ni Senior Police Officer 2 Francis Villamor, team leader sa mao’ng operasyon nga taud-taud na usab nila nga gipanid-an sa ilegal nga kalihukan si Anquilan human sila nakadawat og impormasyon.
Gamit ang P200 nga marked money nakapalit og usa ka pakete sa gituohang shabu ang asset sa kapolisan gikan sa suspek hangtud nga ila kini gidakop.
Si Villamor niingon nga matag buntag sa Cambuntan magpuwesto si Anquilan aron mamaligya og shabu ug didto ra usab mosuyop sa mga kubol-kubol.
Ang suspek nilimod nga iya ang mga kubol-kubol diin igo lang daw kini magpuwestohan sa mao’ng dapit.
Nasayran usab sa kapolisan nga naggikan sa Dakbayan sa Sugbo ang supply sa drugas sa dinakpan apan wala na kini nakahibalo kung asa dapit sa siyudad ug kung kinsa ang supplier kay igo lang daw kini kontakon sa cellphone ug lain tawo usab ang mohatud sa mga butang.
Lakip sa mga nasikop mao sila si Allistair Bargamento, Vicente Dungog, Dic Norman Cuizon, Allaindelon Abeso, Limuel Secretaria, Ruben Palina, Regino Cabaluna ug Dickstein Bryle Fariolen.
Sigun pa ni Villamor nga ang mga suspek nadakpan human nagsuyop og gituohang shabu sulod sa mga kubol-kubol.
Narekober sa kapolisan ang duha ka dagku’ng putos ug 144 ka gagmay nga pakete sa gituohang shabu nga mokantidad og P185, 968.
Gipaslak na sa selda ang mga dinakpan nga gikatakda’ng pasakaan og tukma’ng kaso. (BANAT NEWS)