CEBU, Philippines - Sugod karon, masinati ang bag-ong rota sa mga sakyanan nga moagi sa Dakbayan sa Mandaue nunot sa pagsemento sa Ouano Avenue gikan sa eskina A.C. Cortes hangtud sa Mandaue City Sports Complex.
Ang motorista gikan sa Marcelo B. Fernan Bridge molahos sa Cebu North Hagnaya Wharf Road sa may Pacific Mall paingon sa Mabolo.
Ang gikan sa Serging Osmeña Boulevard molahos sa dalan Logarta ug Cebu Hagnaya Wharf Road lahos sa U.N. Avenue (Pacific Mall) hangtud sa Marcelo B. Fernan Bridge.
Karong Biyernes sirado usab ang pikas habig sa Mandaue-Mactan Bridge mao’ng giawhag sa Department of Public Works and Highways ang mga motorista sa pag-agi sa Marcelo B. Fernan Bridge.
Matud ni DPWH-7 Director Ador Canlas nga ang pag-ayo sa Ouano Avenue molungtad hangtud sa Hulyo samtang ang pag-ayo sa Mandaue-Mactan Bridge molungtad sa Disyembre karong tuiga.
Hinuon sumala pa ni Canlas nga nisugot ang kagamhanan sa Dakbayan sa Mandaue nga 24/7 ang trabaho maong mas masayo ang paghuman sa proyekto. (BANAT NEWS)