CEBU, Philippines - Patay nang nadiskubrehan ang usa ka drayber sa septic truck sa mismo sa tangke sa hugaw sa gimaneho niining sakyanan kagahapon.
Ang namatay mao si Roldan Manlucot,39, lumad nga taga Jaclopan, Talisay City, drayber sa Bonnie and Jane Septic Tank Services nga nagbase diha sa Tupas St. Brgy. Pasil ning dakbayan.
Sumala pa ni Police Officer 3 Winston Ybañez, imbestigador sa Homicide Section sa Cebu City Police Office, pasado alas-12 sa kaadlawon kagahapon naghabwa og hugaw sila si Manlucot kauban sila si Crislito Villahermosa, 39, ug Romeo Rabadon, 53, diha sa usa ka panimalay sa Mambaling.
Apan samtang nagpasuyop sa hugaw, matud pa gisultihan si Manlucot sa mga kauban nga ipasusi ang tangke sa trak kay basin moawas ang hugaw.
Nahibulong na lang sila nga nahuman na lang ang ilang gibuhat wala na nila igkita ang drayber hangtud naabtan sila og alas-3 sa kaadlawon wala gyud nila kini makita ug gimandoan na lang sila sa ilang amo nga pabalikon sa ilang buhatan aron mag-ilis og drayber.
Human niadto, gidala nila ang trak sa South Road Properties diin adunay material recovery facility ug gihabwa ang hugaw ug pagkahuman nilahos sila sa laing kliyente sa Lahug.
Apan pag-abot sa Lahug, ilang gisusi ang tanke ug didto nakugang sila nga adunay patay’ng lawas sa ilawom ug ilang nasuta nga si Manlucot diay kadto.
Dali silang mibalik sa ilang opisina dala ang trak apan sa pagdalidali sa drayber nga si Robinson Manolo nakasaghid pa sila og motor apan ilaha kining gibiyaan maong gigukod sila sa mga sakop sa Mobile Patrol Group.
Dihang naabtan sila, ilang gipahibalo nga adunay patay nga tawo sa ilang trak maong gitugotan silang makalahos sa ilang opisina ug didto gihabwa si Manlucot nga wa nay kinabuhi.
Gidudahan nga nakuyapan kini dihang nahanggab ang methane gas nga normal sa mga nadugta nga hugaw sa pagsusi sud sa tangke.
Girekomendar karon nga ipaawtopsiya ang lawas ni Manlucot pagtino kun unsay nakaingon sa kamatayon niini. (BANAT NEWS)