CEBU, Philippines - Nangayo og pasaylo si suspended mayor Michael Rama sa mga tawo nga nasuko kaniya tungod sa pag-selfie atol sa pagpangalawat niadtong Domingo sa kataposan nga Santos nga Misa sa 51st International Eucharist Congress (IEC) nga gihimo sa South Road Properties.
Apan giklaro ni Rama nga ang mga tawo diha sa palibot maoy mihangyo kaniya nga magpakuha og hulagway kauban siya ug wala siyay intensyon nga bastoson ang kalihokan nga maoy pagsabot sa uban.
Giklaro usab ni Rama nga ang maong hulagway gikuha layo sa San Pedro Calungsod Templete.
Aduna usab hulagway si Rama nga gipakita diin nag-selfie siya kauban ang mga obispo.
Apan alang sa iyang kaatbang sa pagkamayor nga si kanhi mayor Tomas Osmeña , desperado ug KSP (kulang sa pansin) si Rama.
Gisumbalik og saway ni Rama si Osmeña ug si South District Kong. Rodrigo Abellanosa sa nag-viral nilang hulagway sa social media nga naglingkod sa usa ka lamesa nga adunay bino ug pulotan sud sa usa ka kapilya.
Matud pa ni Rama, kini maoy klarong walay respeto. Samtang gitubag usab ni Rama nga ang streamer nga gibutang diha sa South Road Properties (SRP) atol sa Statio Orbis nga adunay nakaprintang “Binay Country” dili kini ilaha.
Si Barangay Tinago Kapitan Joel Garganera kinsa nalakip sa Security Group sa IEC sayo pa sa buntag ila dayon kining gipatangtang sa Department of Public Services (DPS).
Apan aduna gihapoy nanggawas nga hulagway sa streamer diha sa social media ug gipasangil ngadto sa grupo ni Rama. (BANAT NEWS)