CEBU, Philippines - Gibalik na sa normal ang operasyon sa biyahe sa mga barko sa mga shipping companies nga nag-operate sa Dakbayan sa Toledo paingon sa Dakbayan sa San Carlos sa Negros Occidental.
Kini human nga wala palargaha ang mga barko sa nakalabay’ng adlaw tungod sa kadagko sa mga bawod sa dagat dala sa hanging amihan ug may gipagawas nga gale warning ang Pagasa.
Ang dagkong barko sa Lite Shipping Corporation gitugutan na pagbiyahe og balik. Apan wala pa gihapon nakabiyahe ang mga fastcrafts nunot sa dagkong mga bawod.
Una niini dili momenus sa usa ka gatus ka mga pasahero ang natanggong sa Toledo City Port Terminal. Ug sa pagbalik sa biyahe sa mga dagkong barko pa sila nakapadayon sa ilang mga biyahe.
Gawas sa mga pasahero dili momenos usab sa 10 ka mga cargo trucks ang wala makabiyahe paingon sa Negros Island. (BANAT NEWS)