CEBU, Philippines - Gibalibaran ni Cebu City Treasurer Diwa Cuevas ang hangyo sa mga opisyal sa Barangay Labangon nga ang city hall maoy moabaga sa honorarium sa dugang tanod nga kuhaon alang sa ilang barangay.
Ang Labangon Barangay Council nipasar og resolusyon nga nag-awhag sa city hall nga tabangan sila aron makakuha og dugang 20 ka tanod nga moserbisyo sa ilang barangay. Si Kapitan Victor Buendia mitataw nga kuwang ra gihapon ang ilang 20 ka tanod nga madestino sa lapad kaayo nila nga barangay.
Ang Barangay Labangon usa sa mga dagko kaayong barangay sa dakbayan sa Sugbo. Ang Local Government Code naglatid nga kutob ra sa 20 ka tanod ang mahimong hatagan og honorarium sa barangay.
Kini maoy rason nga ang mga opisyal sa Labangon nagpatabang sa city hall. Apan matud ni Treasurer Cuevas nga klaro kaayo nga ang Section 393 (d) sa Local Government Code nagtugot lang nga 20 ra ka tanod sa usa ka barangay ang mahimong hatagan og honorarium.
Ang ubang dagkong barangay dinhi sa dakbayan sa Sugbo nikuha og subra sa 20 ka tanod, apan ang uban igo ra nila gipasul-ob og uniporme sa tanod, apan gitabangan sila nga ma-hire isip guwardiya sa mga balay-patigayon.
Ang resulta, gawas nga sila makakuwarta gikan sa sweldo sa balay-patigayon nga ilang giserbisyohan, magsilbe pa sila nga nagbantay nga moislag ang mga badlongon sa barangay diha sa dapit nga sila nadistino. (BANAT NEWS)