CEBU, Philippines - Usa ka 27-anyos nga taga Barangay Pit-os, dakbayan sa Sugbo kinsa nagmasulob-on kay gibiyaan sa iyang asawa human kini mapriso may kalambigitan sa drugas, naghikog kagahapon sa kaadlawon.
Si Jet Gaviola naghimo pa og suicide note nga nangayo’g pasaylo sa iyang inahan tungod sa iyang gihimo nga pagbitay sa iyang kaugalingon sulod sa ilang panimalay.
Si PO3 Winston Ybañez, imbestigador sa homicide section sa Cebu City Police Office, mitug-an nga duha ka tuig sa bilanggoan si Gaviola ug bag-ohay pa kini nga nakagawas.
Nagtuo ang inahan ni Gaviola nga ang iyang anak naguol pag-ayo tungod sa pagbiya sa iyang asawa sa ilang panimalay ug gidala pa ang ilang anak. (BANAT NEWS)