CEBU, Philippines - Mapahimuslan ra gihapon ang mga sobrang pagkaon sa 51st International Eucharistic Congress tungod kay ipanghatag kini sa nagkadaiya’ng institution human sa mga kalihukan.
Matud ni Brenette Abrenica, sakop sa food committee, nga aduna sila’y dul-an sa 2,000 ka volunteers diin lain-lain ang mo-duty matag adlaw ug lain-lain usab nga kagustuhan sa mga delegado ang ilang madawat ug lakip usab sa lain-lain nga caterer ang tighatud sa pagkaon adlaw-adlaw.
Sumala pa ni Abrenica nga sulod sa lima ka adlaw sa IEC Pavilion, wala kaayo sila’y dagkong problema nga nasugatan gawas sa unang adlaw diin aduna gyu’y mga nangapan-os nga pagkaon tungod kay sa unang adlaw sayo kini nahatud ug nabuwad pa gyud sa init. Gibutyag ni Abrenica nga matag adlaw nga dili mahurot ang ilang pagkaon ila kining ihatud sa mga tawo sa kadalanan, balay samaritano, institution sa Guadalupe ug uban pa.
Gipadayag usab ni Abrenica nga matag meal box ila kining ihatud ngadto sa prisohan ug sa pipila ka institution aron mahimo pa nila nga magamit tungod kay usa man kini ka lig-on nga sudlanan.
Si Abrenica nipadayag nga gikan sa pagbukas hangtud sa ikalimang adlaw, wala pa sila’y nadawat nga mga reklamo nga dunay nagdaut ang tiyan sa ilang gikaon tungod kay kanunay nilang gibantayan ang mga pagkaon nga ilang ipangapod-apod.
Samtang si Medardo Batiller, pangulo sa Emergency Rescue Unit Foundation, nikonpirmar nga kagahapon sa buntag dunay usa ka Obispo nga naglain ang tiyan ug nagsuka apan pag-adto sa iya’ng mga sakop sa hotel nga gipuy-an, okey na ang kahimtang.
Usa ka volunteer nga si Happy Maries Pasaol, tinun-an sa University of San Carlos, nibutyag nga daku kaayo niyang kalipay nga naapil sa kalihukan tungod kay talagsaon kini. ((BANAT NEWS)