CEBU, Philippines - Mitambong sa kalihokan sa International Eucharistic Congress dinhi sa Sugbo nabiktima sa mga kawatan human gibanosan siya og sud sa iyang panimalay ug gihakot iyang mga butang.
Ang insidente nahitabo diha sa Brgy. Cansaga, Lungsod sa Consolacion samtang wala diha ang pamilya sa tagbalay nga si Grace Horonda,50, kay nitambong kini sa IEC activities sa Dakbayan sa Sugbo.
Si Police Officer 1 Socrates Borinaga sa Consolacion Police Station mibutyag nga midangop kanila ang biktima human niini nadiskubrehan sa iyang pag-abot gikan sa Cebu City nga gilungkab na iyang balay.
Nadakpan hinuon ang duha ka mga suspetsado sa follow up operation sa kapolisan ug giila nga mao sila si Gabriel Mansueto Ceniza Jr., alyas Gabby, 32 anyos ug Joseph Sixto Mata, 38, iyaha ra pud mga silingan.
Matud pa ni Borinaga abli na ang luyong bintana kay gilungkab kini ug nadala ang ilang mga bulawang kuwentas, singsing nga adunay diamond, kuwentas nga adunay pendant, singsing ug mga parisan sa ariyos.
Gisakiyo usab ang laptop, mga digital cameras, mga cellphones, mahalon nga bag, sapatos ug cash nga mokabat sa P20 mil nga ang tanan gibanabanang mokabat sa P343 mil.
Wa hinuon matino kun nabawi ba ang mga nahanaw nga butang ug kwarta sa biktima. (BANAT NEWS)