CEBU, Philippines – Ang importansiya sa Eukaristiya ug mga kausaban nga nahatag sa kinabuhi sa tawo ang unod sa ikatulong adlaw sa Congress Proper sa 51s International Eucharistic Congress kagahapon.
Human sa morning prayer nga gipasiugdahan ni Rev. Msgr. Richard Kayondo, gisunod dayon ang Catechesis diin ang gihisgutan mao ang “The Eucharist: Celebration of Paschal Mystery” diin si Most Rev. Robert Barron ang nibatbat.
Matud ni Rev. Barron nga kung kita naanad ug nagtuo sa sayop nga pamaagi, kinahanglan kini ibalik sa matarung bisan pa man og dili ingon ana kasayon ang proseso apan kinahanglan nga buhaton.
Dugang niini nga angay hinumduman si Hesus nga usa usab ka sakripisyo sanglit kabahin sa woman execution human kini gipanamkon sa Mahal nga Birheng Maria.
Si Marianne Servaas kinsa nihatag og testimonya niasoy nga dihang bata pa dili siya Katoliko ug nagdaku siya nga daghan og mga pangutana ilabi na usab nga nakasinati kini og pagpangabuso.
Dihang hingkod na ang iyang panuigon nakadesider kini nga mobalhin sa pagka-Katoliko ug didto iyang nasinati ang tinud-anay nga kalipay.
Kini nitataw nga nianhi siya sa Pilipinas ug iyang nabati ang kainit sa pagtuo sa mga Pinoy hinungdan nga usa kini sa rason nga mas nilig-on ang iyang pagtuo sa Labaw’ng Makagagahum.
Alang niya ang mga Pilipino sacramental ug iya’ng gihulagway nga ang kalipay sa mga Pinoy nagpakita sa pagkamapasalamaton ug kamapaubsanon ug nanghinaut nga dili pilion ang artipisyal nga kalipay.
Samtang si Gaudencio Cardinal Rosales kinsa maoy nimisa, ang unod sa iyang homiliya mao nga kun gusto kita nga dawaton ang Eukaristiya, kinahanglan andam kita mopas-an sa Krus sama sa gihimo ni Hesus.
Nihulagway usab kini nga ang Eukaristiya dili lang usa ka “passover” apan usa kini ka misyon aron dad-on si Hesus ngadto sa mga tawo. Samtang subay sa kalihukan kagahapong adlawa, si Papal Legate Charles Cardinal Bo sa Archdiocese of Yangon, Myanmar nisusi sa media center ug sa ubang dapit sa IEC Pavilion. – /GMR) (BANAT NEWS)