CEBU, Philippines – Temporaryo’ng dili paagian sa mga sakyanan ang mga dalan nga maagian sa rota sa Parish Encounter o Visita Iglesia sa mga delegado sa International Eucharistic Congress (IEC) karong hapon.
Matud ni Cebu City Transportation Office operation head Jonathan “Joy” Tumulak nga makamugna gyud kini og grabe’ng huot sa trapiko.
Gihangyo ni Tumulak ang mga motorista nga likayan lang una ang mga dalan nga atubangan o duol sa mga simbahan nga apil sa bisitahon sa mga delegado.
Kini sama sa Cebu Metropolitan Cathedral, St. Joseph Parish sa Mabolo, St. Therese Parish sa Lahug, Our Lady of the Sacred Heart Parish sa dalan Escario, Our Lady of Guadalupe sa Guadalupe, Santo Rosario Parish sa dalan P. del Rosario, Our Mother of Perpetual Help Parish (Redemptorist), Sacred Heart Parish sa dalan D. Jakosalem, Our Lady of Lourdes Parish sa Punta Princesa ug San Roque Parish sa Mambaling.
Adunay mga traffic personnel ang ipamutang sa kadalanan aron paggiya sa mga motorista.
Magsugod ang Visita Iglesia sugod alas 4 sa hapon hangtud na sa kadlawon.
Gawas niini aduna pa’y upat ka simbahan sa Dakbayan sa Mandaue nga bisitahon sa mga delegado nga mao ang Gethsemane Parish sa Casuntingan, San Roque Parish sa Subangdaku, National Shrine of St. Joseph sa Centro ug Holy Family Parish sa Maguikay.
Molungtad sa duha ngadto sa tulo ka oras ang kalihukan sa tagsa-tagsa ka simbahan tungod sa misa ug cultural presentation alang sa mga delegado. – /GMR) (BANAT NEWS)