CEBU, Philippines – Nadakpan sa pagpangronda sa kapolisan ang gikatahapan nga level 2 drug pusher sa Estrera Compound, dalan Basubas, Brgy. Tipolo, sa Dakbayan sa Mandaue ug nasakmit ang mokabat sa P177,000 nga kantidad sa giputos nga shabu.
Si Police Officer 3 Julius Ceasar Tampus sa City Intelligence Branch (CIB) sa Mandaue City Police Office (MCPO) miila sa ilang nadakpan nga mao si Dino Simblante Dahao, 41.
Naaktohan usab ang iyang sakop nga namutos og shabu nga si Raymond Dacay Marababol, 25.
Ang operasyon gilusad pinasikad sa search warrant nga giisyu ni Judge Teresita Abarquez Galanida sa Branch 56 sa Regional Trial Court (RTC) 7 sa Dakbayan sa Mandaue.
Duha ka dagkong putos nga shabu nga gibanabang mokabat lima ka gramo ug drug paraphernalia ang nasakmit sa operasyon.
Samtang si Marababol nasakmitan og usa ka gamay nga pakete ug mga drugs paraphernalia. – /EIM) (BANAT NEWS)