CEBU, Philippines – Patay ang 45-anyos nga babaye human gidunggab sa pag-umangkon sa D. Macapagal Highway, Poblacion, Dakbayan sa Toledo alas 9:30 kagahapon sa buntag.
Giila ang namatay nga si Leah Normandia Ragpala, minyo nga nagpuyo sa nahisgutang lugar, samtang ang gituohang suspek mao si Bayani Normandia Abutin, III, hingkod.
Niadto’ng Domingo naglingaw-lingaw pa ang biktima kauban sa iya’ng mga higala sa pagsaksi sa Sinulog Parade sa Dakbayan sa Toledo.
Base sa imbestigasyon nila ni SPO4 Praxilo Albiso ug SPO1 Salvador Samillano nga ang suspek nagpuyo sa panimalay sa biktima.
Kagahapon sa buntag adunay panaglalis ang duha ug nagbinayloay og mahait nga pulong ug nisangpot sa pagpanunggab gamit ang hait nga kutsilyo sa tuo nga bahin sa ilok sa biktima.
Daling gitabang ang biktima ug gidala sa Toledo City hospital apan nakabsan kini sa iya’ng kinabuhi.
Samtang ang suspek giingong nisuway pa unta sa pag-eskapo apan human sa pipila ka oras boluntaryo kini nga nitahan sa kapolisan.
Gituohang tiggamitan og ginadili’ng drugas ang suspek apan padayon pa kini’ng gisuta sa kapolisan. – /GMR) (BANAT NEWS)