CEBU, Philippines – Onse ka mga hepe sa kapulisan sa probinsya sa Sugbo ang gikatakdang ipangbalhin tungod sa ilang pag “relax-relax”sa trabaho ilabi na sa kampanya batok sa ilegal nga drugas sumala pa sa direktor sa Cebu Provincial Police Office nga si Senior Superintendent Clifford Gairanod.
Ang direktor mimando og “Oplan Limpyo Probinsya”aron pangsikupon ang mga drug personalities sa ilang mga hurisdiksyon.
Ang mga hepe nga ilahugay gikan sa Alcantara, Ronda, Pilar, Barili, Carmen, Compostela, Oslob, Samboan, Tabuelan, Tudela ug hepe sa Dakbayan sa Toledo.
Matud pa ni Gairanod sa mga tigbalita nga dili na siya mohatag pa og lugway kay sayod nang daan ang maong mga opisyal sa ilang trabaho kay ikaupat na kini ka hugna sa ilang operasyon.
Sumala pa ni Gairanod nga nananghid na siya sa Commission on Elections bahin niini bisan og adunay ban sa paglahugay.
Kadtong mga opisyal nga nadestino sa norte ilabay sa south, samtang ang sa south ilabay usab sa norte.
Sa sunod nga limpyo probinsya sa kapulisan, si Gairanod mibahad mag-atubang na og suspensyon ug kasong administratiba ang mga hepeng di mosanong. – /EIM) (BANAT NEWS)