CEBU, Philippines – Nakuyapan human nakulatahan sa mga tawo ang usa ka lalaki nga gikatahong ni-hostage ug nidunggab sa usa ka babayeng sidewalk vendor diha sa Tabada Street, Brgy. Mambaling ning Dakbayan sa Sugbo kagahapon sa buntag.
Ang suspetsado giila nga si Louie Bontawal, 35, nagpuyo sa Pandayan Street, Brgy. Basak- San Nicolas, samtang ang biktima mao si Lineth Enjambre, 30, nga gidala sa tambalanan tungod sa duha ka samad dinunggaban.
Matud pa ni Senior Police Officer 2 Ruth Violango, imbestigador sa Homicide Section sa Cebu City Police Office nga nahinabi sa Banat News nga samtang namaligya og utanon ang biktima sa maong dapit kalit lang naabot ang suspetsado nga nagdala og taas nga kutsilyo.
Gihawiran sa suspetsado ang babaye ug gitionan sa gidala nga kutsilyo, sumala pa sa mga nakakita, nagtuo sila nga gitulis ang babaye kay nangutana pa kini og kuwarta.
Apan kalit nga gihansakan sa suspek sa ilokan nga bahin sa lawas ang biktima, ang mga tawo nga nakakita sa hitabo daling mitabang sa biktima samtang ang uban nagtinabangay pagkulata sa suspek nga nalukot-lukot sa kalsada.
Ang pagkulata nakuhaan og mga videos sa mga tawong anaa sa palibot ug gi-post sa social media nga dali usab kaayong nag-viral.
Ang mga sakop sa Mambaling Police mao nay misikop sa suspetsado ug gidala sa Vicente Sotto Memorial Medical Center (VSMMC) tungod kay nawad-an kini og panimuot, samtang ang biktima gidala sa Cebu City Medical Center (CCMC) diin kini gi-operahan. Si Violango nagduda nga lango sa ilegal nga drugas ang suspetsado ug natripan niini ang biktima.Walay nakaila sa suspetsado. Matud pang Violango di matawag nga hostage taking ang nahitabo kay kalit lang gidunggab sa suspek ang biktima.
Kasong frustrated murder ang atubangon sa dinakpan nga padayong giatiman sa doktor sulod sa tambalanan. – /EIM) (BANAT NEWS)