CEBU, Philippines – Nagusbat ang dagway sa usa ka wala mailhi’ng lalaki human ginawong pagpusil sa duha ka mamumuno sa Kilawan, Tanke, Dakbayan sa Talisay niadto’ng Sabado sa hapon.
Si SPO2 Yvonne Ilustrisimo, imbestigador sa Talisay City Police Station, nihulagway sa biktima nga nagsul-ob og puti nga T-shirt, jersey short ug adunay gitas-on nga lima ka tiil.
Sigun pa ni Ilustrisimo nga ang ila’ng testigos nitug-an nga siya nakurat diha’ng naghaguros ang biktima ug duha ka tawo nga nagginukdanay samtang siya nag-andam aron magluto.
Nagtuo ang testigo nga komedyahanay ra ang duha ka habig apan sa diha’ng na-baboy na ang biktima, usa ang nipusil igo sa tuo nga bahin sa ilokan ug wala pa gyud natagbaw gitiwasan kini tumong sa nawong samtang nahagba ug gibiyaan sa mga mamumuno.
Matud ni Ilustrisimo nga wala sila’y nakuha’ng kabhang sa bala sa crime scene hinungdan sa ila’ng pagduda nga .38 revolver ang gigamit sa pagpusil sa biktima.
Nailhan lang ang biktima nga si Waylie ug nagpuyo sa Lungsod sa Minglanilla.
Gidudahan nga mang-gamitay og ilegal nga drugas ang biktima hinungdan nga sa iya’ng pagsuroy sa lugar, nakakita kini og ingkwentro hangtud giihaw.
Ang patay’ng lawas sa biktima anaa sa St. Francis Funeral Homes sa Bulacao. – /GMR) (BANAT NEWS)