CEBU, Philippines – Nadakpan sa buy-bust operation sa kapolisan sa Lungsod sa Liloan ang gikatahapang drug pusher sa Barangay Poblacion ug laing duha usab ka tawo nga nagsuyop og shabu ang nadakpan sa Lungsod sa Consolacion.
Si Police Office3 Jayson Gayo sa Liloan Police Station niila sa nadakpan nga si Jayson dela Rosa, 30, ulitawo nga taga Barangay Poblacion.
Gipangulohan sa ila’ng hepe nga si Senior Inspector Ramil Morpos ang operation hinungdan sa pagkasakmit sa usa ka pakete’ng shabu bugti sa P200 nga marked money nga gipalit sa poseur buyer.
Diha’ng girekisa ang kalawasan sa dinakpan, mao’y nakuha ang dugang pa’ng tulo ka gagmay nga pakete sa shabu ug mga drug paraphernalia.
Samtang sa Barangay Tayud, Consolacion, duha ka lalaki kinsa ang usa minor de edad ang naaktuhan sa kapolisan nga nagsuyop og shabu.
Si Police Officer 1 Socrates Borinaga niingon nga nakadawat sila og tawag sa telepono gikan sa nagpakabana nga molupyo nga may grupo sa mga lalaki ang nagsuyop og shabu sa panimalay ni Willy Acay nga gidakop na unta sa usa ka pagpangronda niadto’ng Enero 8.
Diha’ng nahidangat sila sa mao’ng dapit, dali usab nga nakapanagan ang mga lalaki nga nagsuyop og shabu hinungdan nga nahitabo ang ginukdanay nga niresulta sa pagkasikop ni Louie Tortosa Cacanog, 18, ug sa kauban nga 17-anyos.
Nasakmit gikan sa dinakpan ang gagmay nga pakete sa shabu ug mga drug paraphernalia. – /GMR) (BANAT NEWS)