CEBU, Philippines – Nalukapa sa sawog sa mall sa Tabunok, Dakbayan sa Talisay ang usa ka babaye human gisumbag sa lalaki nga iyang gisumbong nga nigamit og 25 sentimo aron moduwa og computer sa World of Fun niadtong Biyernes sa gabii.
Ang babaye nailhan nga si Osmarbeth Ledres, 32-anyos, taga 42 Spoliarium St., Cebu City samtang ang suspek mao si Raniel Bayron, 32, taga Quiot Pardo, Siyudad sa Sugbo.
Base sa imbestigasyon sa kapolisan nga si Ledres ang nakakita sa suspek nga nagkalingaw og duwa sa mga video games sa World of Fun ug nigamit og 25 sentimo imbis mopalit og token.
Si Ledres ang nitawag sa guwardiya ug gipasidan-an nga ang lalaki nanikas. Ang guwardiya nibadlong ni Bayron hinungdan nga ang iyang kalipay naputol.
Si Ledres ang nigawas aron mopalit og pagkaon apan si Bayron nga pwerteng lagota ang niduol kaniya dayon sumbag sa luyong bahin sa iyang ulo hinungdan nga siya nalukapa sa sawog.
Dali nga gitabang ang biktima sa guwardiya ug gisikop si Bayron.
Gikatakdang pasakaan og kaso si Bayron samtang siya gibalhug sa bilanggoan. – /GMR) (BANAT NEWS)