CEBU, Philippines - Naugdaw ang napulo ka balay sa sunog nga niulbo sa Sitio Fatima, Barangay Apas, Dakbayan sa Sugbo pasado alas 7 sa nakalabay nga gabii.
Sa inisyal nga imbestigasyon nasayran nga nagsugod ang sunog sa panimalay sa managkapuyo nga buta nga sila si Maximo Cahatol ug Corazon Belizar.
Dili pa makatumbok ang kabomberuhan kung unsa ang hinungdan apan base sa impormasyon nga nakuha sa Banat News gikan sa mga silingan nga gumikan sa nibuto nga charger sa cellphone ang hinungdan.
Si Ethel Belizar, paryente sa nasunugan, niingon nga atol sa sunog bugtong anak ni Belizar nga si Cheki, hingkod ug usa ka bakol, ang nahabilin sa balay kay matag adlaw mag-adtoan sa Pier 3 ang duha kay ang lalaki motukar og gitara samtang ang babaye magmasahe.
Sigun pa ni Belizar nga ang mga silingan na ang niluwas ni Cheki.
Kadaghanan sa mga namuyo sa lugar mga buta kinsa nangaligid sa bakilid aron pagpaningkamot og dagan palayo sa nagdilaab nga kayo. Ang lugar gitawag usab sa uban og Sitio Buta.
Hinoon atol sa hitabo wala’y gikatahong namatay ug naangol apan nagbilin og P120,000 nga danyos.
Samtang dili mominus sa 30 ka balay ang naugdaw sa sunog alas 11:37 kagahapon sa buntag sa Purok 1 ug 2, Nangka, Lungsod sa Consolacion. Si Fire Officer 2 Jimmy Cerenio Borres niingon nga sa pasiuna nilang pakisusi ilang nasayran nga nagsugod ang sunog sa panimalay ni Bernadeth Maglasang subay sa pamahayag sa mga residente.
Apan dihang nahinabi sa Banat News si Maglasang, hugot kini’ng nihimakak sanglit wala’y tawo ang ilaha ug wala usab siya maggamit og butane.
Gibasol sa pipila ka residente ang matud pa dugay nga pag-abot sa kabomberuhan diin ilang gihulagway nga kung nakaresponde lang dayon hayan dili na modaku ang kayo.
Apan kini gihimakak ni Borres kinsa nitataw nga dihang nadawat nila ang alarma dali dayon sila’ng niresponde apan iyang giangkon nga naglisud sila sa pagsulod sa lugar gumikan usab sa kahagip-ot.
Samtang si Kapitan Rey Cataluña niasoy nga duha ka barangay ang naapektuhan sa sunog.
Ang mga apektadong residente temporaryo nga ipahiluna sa barangay hall aron mahatagan sa ilang mga nag-unang panginahanglanon. (BANAT NEWS)