CEBU, Philippines – Nawad-an sa salapi ug mahalong cellphone ang amahan ug anak kauban sa nurse nga nagtrabaho sa usa ka tambalanan diha’ng gitulis sa armado’ng mga lalaki nga nagsakay og motorsiklo sa Alang-Alang, Dakbayan sa Mandaue atol sa pagbisita sa imahe ni Senyor Santo Niño.
Si Police Officer 2 Jayson Flores sa Presinto 1 sa Mandaue City Police Office niila sa mga biktima nga sila si Renato Cagitla, 58, anak nga babaye nga si Claudine, ug Ivy Gica nga taga Highway 77, Talamban, Dakbayan sa Sugbo.
Matud ni Flores nga alas 10 pasado sa gabii nagpaabot og taxi ang mga biktima diha’ng kalit gihunungan og motorsiklo nga giluwan sa duha ka wala hiilhi’ng lalaki nga ang angkas niibot og armas ug nideklarar nga tulis.
Nakuha gikan kanila ang ila’ng mga cellphones nga balor og P18,000 matag usa, salapi ug bag nga adunay sulod nga mahalon nga mga butang.
Human nakuha ang mao’ng mga butang sa tulo ka biktima, ang mga tulisan nipabulhot pahilayo paingon sa Lungsod sa Consolacion. – /GMR) (BANAT NEWS)