CEBU, Philippines – Patay ang operator sa ferris wheel nga usa sa mga kalingawang gidalit sa Kasadya sa SRP sa Dakbayan sa Sugbo human kini nakuryentihan samtang nag-ayo niini.
Ang nakuryentihan mao si Johnny Tagaylo Rosales, taga V. Rama Avenue sa Brgy. Calamba dinhi sa siyudad ug trabahante sa RTG Carnival.
Sumala pa ni Police Officer 3 Lester Dajao, sakop sa Mambaling Police nga nahinabi sa Banat News paingon nang manirado ang maong peryahan apan sa dili pa unta sila mamahuway, gi-welding una ni Rosales ang naguba nga bahin sa ferris wheel.
Human napaandar ni Rosales ang welding machine gikatahong misaka kini sa ferris wheel apan nakadungog ang iyang mga kauban og kusog nga buto ug sa ilang pagsusi ilang nakita si Rosales nga mipilit sa puthaw ug nabitay gikan niini kay naipit diay ang iyang tiil ug wala na maglihok.
Usa sa mga kauban ni Rosales ang dali nga mitabang apan sa dihang paingon na unta kini mosaka nakabantay kini nga ‘grounded’ ang puthaw ug iyang nasubay nga didto kini gikan sa welding machine kay mitapot diay ang linya niini.
Human nadala sa ubos si Rosales gidala kini dayon sa Cebu City Medical Center (CCMC) apan gideklara nga “dead on arrival” sa doktor.
Si Dajao miingon nga wala’y nakitang mga paso sa lawas sa biktima aron madudahan nga adunay foul play sa insidente. (Jojo C. Ugdol/EIM)(BANAT NEWS)