CEBU, Philippines - Gitulis sa duha ka armadong lalaki ang usa ka babayeng tinun-an nga gikan pa sa Misa Novena diha sa Basilica Minore del Sto.Niño sa Dakbayan sa Sugbo atol sa pagpauli niini diha sa Brgy. Poblacion, Lungsod sa Compostela.
Si Senior Police Officer 3 Pedro Enriquez sa Compostela Police Station miila sa biktima nga mao si Catherine Quindao, 20, tinun-an sa kolehiyo sa usa ka unibersidad sa Dakbayan sa Sugbo.
Matud pa ni Enriquez, pagkanaog pa lang sa biktima sa jeepney gisugat dayon kini og duha ka wala hiilhing lalaki nga nagsakay og motorsiklo.
Ang nag-angkas nga lalaki mideklarar og tulis ug pugsanong gikuha iyang cellphone ug kwarta niining P3 mil ug diretsong nangikyas.
Ang kapolisan padayon pa sa ilang imbestigasyon sa maong hitabo samtang gihingusgan karon ang pagbutang og mga police checkpoints nunot sa pagpatuman sa Comelec gun ban. (BANAT NEWS)