CEBU, Philippines - Human sa duha ka tuig, balik sa orihinal nga Ouano Wharf magsugod ang fluvial procession sa kapistahan sa Senior Santo Niño ugma sa buntag.
Gani naghinam-hinam nga makakita sa imahe sa Balaang Bata mismo ang kapitan sa barko nga gihimo’ng galleon sulod na sa 42 ka tuig.
Si Benedicto Melendres, 68-anyos, nitug-an nga sukad niadto’ng 1974 sa pagsugod gyud sa pamilya’ng Ouano sa ila’ng panaad, siya na ang kapitan sa duha na ka barko nga luwanan sa imahe.
Usa siya sa deboto sa Balaang Bata ug kini ang iya’ng gitan-aw nga nakahatag kaniya og milagro diha’ng na-ospital siya human giatake.
Sama ni Melendres, si Leonila Torremocha, 52-anyos, kinsa nanglimpyo sa galleon sulod na sa 10 ka tuig niasoy nga giisip niya nga grasya nga makita duol ang pilgrim image sa Balaang Bata.
Duha ka tuig nga wala gipagamit ang family wharf sa mga Ouano human naguba sa linog niadto’ng Oktubre 2013.
Karon excited na ang pamilya nga sa ila’ng tugkaran na usab mogikan ang gipangaliyahan sa kadaghanan nga Senior Sto. Niño
Niadto’ng Lunes gisugdan sa mga trabahante ang repainting sa barko.
Samtang gipahibawo sa Cebu City Transportation Office nga sirad-an alas 12 sa udto ang kadalanan ug eskina nga agian sa solemn procession ugma sa hapon.
Matud sa operation head sa CCTO, Jonathan “Joy” Tumulak, nga alas 10 pa lang himuon na nila ang clearing sama sa paghipos sa mga sakyanan nga makaali sa dalan.
Temporaryo usab nga sirad-an ang Cebu South Bus Terminal sugod alas 5 sa kadlawon ugma hangtud na sa Domingo sa gabii ug temporaryo nga ipahimutang sa South Road Properties sama sa niaging tulo na ka tuig.
Ang rota sa prosesyon mao ang gikan sa Basilica Minore del Santo Niño paingon sa D. Jakosalem liko sa tuo sa Magallanes paingon sa Borromeo liko sa tuo sa Leon Kilat liko sa wala sa N. Bacalso Avenue liko sa tuo sa dalan V. Rama liko sa tuo sa B. Rodriguez paingon sa Fuente Osmeña Rotunda liko sa tuo sa Osmeña Blvd. deretso balik sa Basilica.
Sa laing bahin, buksan na karong adlawa ang Devotee City sa Compaña Maritima alang sa tanang dayo nga gusto mamista sa Dakbayan sa Sugbo nga wala’y kapuy-an.
Kini maka-akomodar og 3,000 ka deboto diin 120 ka container vans ang gipagamit sa 2GO Shipping Lines.
Matud sa chairman sa Devotees City, Konsehal Roberto “Bob” Cabarrubias nga alas 3:00 karong hapon buksan nila kini pinaagi sa usa ka misa.
Ang Devotee City adunay elektrisidad, tubig ug shower area ug anaa na sa mopuyo ang pagdala sa gamit sa pagkatulog ug pagluto. Aduna'y duha ka police personnel ang mobantay sulod sa 24-oras ug may medical van nga magamit kung may emerhensiya.
Matud ni Cabarrubias nga ipakita lang nila ang ticket sa bus o sa barko kung gikan sila gawas sa Sugbo aron maka-avail. (BANAT NEWS)