CEBU, Philippines - Kapin sa 30 ka contingents ang gipaabot nga mosalmot sa Sinulog Grand Parade karong Domingo.
Sa katapusang adlaw sa pagpangrehistro kagahapon, ang Sinulog Foundation Inc. nakarehistro og 15 alang sa Sinulog-Based Category ug 15 usab sa Free Interpretation Category.
Matud ni Ricky Ballesteros, executive director sa SFI, nga wala pa naapil sa ihap ang mga nidaug sa Sinulog sa Kabataan kinsa mosalmot usab sa grand parade.
Usa sa wala moapil ang Alang-Alang, Leyte nga champion duha ka tuig na ang nilabay ug runner-up sa Sinulog 2015.
Sigun ni Ballesteros nga ang nagkaduol nga piniliay karong Mayo ang rason sa mayor sa wala pag-apil.
Ang North Cotabato nipadayag usab sa susama’ng rason.
Ang Abellana National School sa Dakbayan sa Sugbo ang may kakulian usab samtang ang Dakbayan sa Talisay may bulok politika usab ang wala nila pagsalmot karon bisan sa ila’ng kadaugan sa niagi’ng tuig.
Pito na ka out-of-town contingents ang nalista sa SFI nga mao ang Panglao Bohol; Abuyog, Leyte; Tribu Placernon; Himag-ulaw Placer Masbate; Lanao del Norte, Tangub City ug ang Province of Lanao del Norte.
Ang Tribu Placernon ug Himag-ulaw Placer Masbate mao’y mananaug sa Sinulog Based ug Free Interpretation Category sa niaging tuig.
Samtang gipanghinaut sa Siyudad sa Naga nga malakip sila sa Top 5 sa Sinulog Grand Parade.
Ang Naga nahimung ikaduhang dapit sa Sinulog sa Kabataan sa Lalawigan niadtong Sabado ug nanghakot og daghang minor awards.
Ang mga tinun-an sa Naga Central School ang nibisita sa buhatan ni Mayor Valdemar Chiong bitbit ang ilang mga trophies kagahapon sa buntag aron pagpasalamat sa suporta.
Ang Siyudad sa Naga nihatag og P550 mil ug nidugang og P150 mil aron magamit sa ilang pagkaon atol sa Sinulog Grand Parade.
Matud ni Analiza Layasan, principal sa Naga Central School, nga nigasto sila og kapin P2 milyones apan wala nila kini igsapayan bisan P330 mil lang ang ila natigum nga premyo sanglit halad nila kini sa Senior Sto. Niño.
Iyang gipasalig nga aduna sila’y bag-ong pakulo sa ila unyang pasundayag karong Domingo.
"Ang importante nga niapil ang Siyudad sa Naga agi’g pasalamat ni Senior Sto. Nino, ikaduha nana ang modaug," matud ni Chiong. (BANAT NEWS)