CEBU, Philippines - Dul-an P2 milyones nga kantidad sa shabu ang nasakmit ug 22 ka tawo ang nasikop sa gihingusgang operasyon batok sa ilegal nga drugas sa kapolisan. Sa Dakbayan sa Toledo, kapin sa tunga sa milyon ka pesos nga shabu ang nasakmit gikan sa balay sa kanhi pulis nga si Rogelio Gutang Jr. sa buy-bust operation sa Brgy. Cabitoonan.
Apan wa madakpi sa grupo ni Senior Police Officer 1 Francis Allen Villamor sa Provincial Intelligence Branch si Gutang human kini nakabantay ug daling miikyas.
Si Gutang ang na-dismiss sa serbisyo human giingong nag absent without leave o AWOL.
Nakuha sa iyang balay ang usa ka dako nga putos sa gituohang shabu, lima ka medium size ug usa ka gamay nga pakete sa shabu. Motimbang kini og kapin 50 gramos ug mobalor og P590, 826.
Samtang nasikop ang gipasanginlang level two drug pusher pinasikad sa warrant of arrest sa Brgy. Don Andres Soriano sa mao gihapong dakbayan nga si
Jeffrey Reroma, 38.
Si Reroma adunay warrant of arrest gikan sa sala ni Judge Hermes Montero sa Branch 59 sa Toledo City tungod gihapon sa kaso sa ilegal nga drugas.
Nakuha gikan niya ang siyam ka gagmay nga pakete sa shabu, usa ka medium nga putos ug closed circuit television kon CCTV. Sa dakbayan sa Lapu-Lapu, nadakpan sa kapolisan diha sa Sitio Saac, Brgy. Buaya si Leon Maglasang, 18.
Nakuhaan kini og 48 ka gagmay’ng pakete ug duha ka medium pack sa gidudahang shabu nga gibana-bana nga mokabat og P100,000.
Dugang nakuha kaniya ang mga drug paraphernalia, mga bala , cash nga P5,100 nga gituohang halin sa ilegal nga drugas.
Sa laing bahin, anak sa konsehal sa Brgy. Inayagan, sa Dakbayan sa Naga ang nadakpan ug giilang si Jeric “Du” Badayos, 35, buwag sa asawa nga nagpuyo sa nahisgutang lugar ug mga kaubanan nga sila si Antonio Olpenario, 19, ug si Mieco Bariquit, 32.
Si Supt. Jovito Canlapan, hepe sa kapulisan sa maong dakbayan nagkanayon nga si Badayos anaa sa ilang drug watchlist.
Nikuha og search warrant ang kapolisan gikan ni Judge Wilfredo Navarro sa Regional Trial Court branch 19, Cebu City alang sa maong operasyon.
Tulo ka pakete sa ilegal nga drugas; drug paraphernalia; timbangan, test tube; .9mm pistol nga adunay lima ka bala ug 12 ka empty shells sa .9 ingon man .22 caliber rifle; CCTV camera ug monitor.
Sa laing operasyon, mokabat sa P500 mil nga kantidad nga shabu ang nasakmit sa kapolisan nga miresulta usab sa pagkasikop sa 16 ka tawo sa managlahing operasyon sa kapolisan sa Argao, Consolacion, Dakbayan sa Danao ug Lungsod sa Tabogon.
Nadakpan sa Consolacion police sila si Jonathan Puerto, alyas Atan, 26, taga Sitio Laray, Brgy. Pitogo, ug ang kauban niini nga 17 anyos, human sila gipalitan og drugas sa police poseur buyer, nakuha gikan kanila ang unom pa ka medium size nga paketeng shabu ug laing 13 pa ka gagmay nga pakete nga moabot og 30.09 gramos ug base sa Dangerous Drugs Board (DDB) mokantidad kini og P364, 620. Ang mga suspek gikatakdang pasakaan og kasong paglapas sa RA 9165. (BANAT NEWS)