CEBU, Philippines - Mga residente sa Sitio Avocado, Brgy. Lahug nga nasunogan apan nagtukod og balik og balay sa luna sa University of the Philippines Cebu gipasakaan og kasong ‘forcible entry’ diha sa korte kagahapon.
Nasayran nga 75 ka mga tawo ang gipasakaan og kaso sa UP diha sa Municipal Trial Court in Cities (MTCC) kagahapon. Si Atty. Liza Corro, dean sa UP-Cebu mihangyo sa korte nga mopagawas og kamandoan nga hunongon na ang pagpuyo sa mga residente sa maong luna, paghunong sa reblocking ug ang pagtukod og balay diha sa yuta sa UP.
Matud niya nga ang gibuhat sa mga residente sa pagtukod og balay gamit ang light materials sa fire site usa ka indikasyon nga gihikawan ang UP sa ilang propiyedad maong nangayo sila’g tabang sa korte.
Si Corro miingon nga gamiton nila ang maong luna sa pagtukod og dugang building nga butangan alang sa senior high school.
Una niini, ang UP nakakuha og temporary restraining order sa korte batok sa reblocking ug construction activities sa maong luna tungod kay nagtuo ang korte nga makatagamtam og dili na mabawi pang danyos ang UP sa gibuhat sa Siyudad sa Sugbo.
Apan si Cebu City acting mayor Edgardo Labella miingon nga wala nay epekto ang TRO kay sa iyang tan-aw nahuman na ang reblocking sa kagamhanan aron pagkabalik sa mga nasunogan. Mipasabot hinuon si Labella nga karong aduna nay TRO ila kining respetohon tungod katungod usab kini sa UP isip tag-iya sa luna.
Hinuon padayon gihapon ang negosasyon sa kagamhanan sa Sugbo sa mga kadagkoan sa UP aron pagsulbad sa problema. (BANAT NEWS)