CEBU, Philippines - Plantsado na ang tanan alang sa umaabot nga 1st Communicants Mass sa dili mominos singko mil ka mga bata karong Enero 30 sa alas-4 sa kahaponon sa Cebu City Sports Center.
Ang mga sakop sa komitiba nagpahigayon og tigum sulod sa CCSC nga gitambongan mismo sa secretary general sa 51st IEC nga si Auxiliary Bishop Dennis Villarojo, mga kauban nga kaparian, religious groups, mga layko, kapulisan ug ni Ricky Ballesteros ang Executive Director sa Sinulog Foundation Inc.
Kagahapon gilibot ni Ballesteros ang mga nitambong sa mga lugar sa CCSC nga gamiton isip vestment area sa mga kaparian, kapahulayan ug kan-anan.
Lakip usab sa gipresentar ni Ballesteros ang mga lugar nga mahimong holding area sa mga bata, samtang kini nagpreparar sa dili pa ang maong dakong kalihukan.
Gituki sa maong tigum ang gikan sa pinakagamay nga detalye sa preparation ngadto sa pinakadako nga panginahanglanon nga naglangkob sa mga lingkoranan, sound systems ug uban pa.
Gitahasan usab ni Ballesteros si Jet Ebo, ang iyang assistant nga mopahigayon og walk through sa mga bisita aron makita ang mga lugar nga gipreparar.
Samtang si Police Superintendent David Señor nga maoy gitahasan sa operation sa kapulisan nibutyag nga 209 ka mga polis ang ipakatap atol sa kalihukan.
Si Auxiliary Bishop Villarojo, sa iyang bahin nibutyag nga nagpahigayon na lang sila karon og mga dry runs aron masuta kung unsa pa ang mga kinahanglang usbon o korihian.
Gikalipay ni Archbishop Jose Palma ang pagkalakip sa dili mominos kwatro sintos ka mga libudsuroy nga maapil sa mga 1st Communicants tungod kay kung dili kini sila hatagan og pagtagad posibleng mabiyaan lang sila diha sa komunidad.Gipadayag sa Arsobispo niining tuig sa Year of Mercy and Compassion maoy giisip nga paghatag og bili sa mga makalolooy.
Usa usab ka consultative meeting ang gihimo kagahapon sa buntag kabahin sa pagpangandam sa 51st IEC diha sa Kapitolyo.
Si Baltazar Tribunalo, hepe sa Provincial Disaster Risk Reduction Management Office (PDRRMO) miingon nga kabahin ang lalawigan sa preparasyon niini.
Si Joy Tumulak, operations manager sa Cebu City Traffic Office mipahibalo nga sa Enero 29, 2016 sa ala 1:00 sa kaadlawon hangtud sa alas 12:00 sa tungang gabii sa Enero 30, 2016 siradohon ang dalan Osmeña Boulevard ug dalan Escario alang sa ipahigayong misa sa IEC diha atubangan sa Capitol building.
Ang Kapitolyo mangandam kini og 15,000 ka lingkuranan sa mga motambong sa misa.
Ang mga emergency vehicles nga gikan sa habagatan nga maghatud og mga pasyente ngadto sa tambalanan anha paagion sa dalan B. Rodriguez.
Samtang ang gikan sa Trans-Central Highway anha paagion sa Gorordo Avenue dayon liko ngadto sa General Maxilom Avenue.
Ang gikan sa amihanan anha paagion sa M.J. Cuenco dayon liko diha sa General Maxilom.
Ang Kapitolyo duna kini i-deploy nga duha ka mobile medical clinic, pito ka emergency medical tents, Armed Forces of the Philippines (AFP) reserved unit ug Red Cross diha sa Osmeña Boulevard.
Ang matag usa sa maong medical tent adunay doktor, nurse ug communicator. (BANAT NEWS)