CEBU, Philippines – Giandam sa siyudad sa Sugbo ang tanang mga rota sa umaabot nga dagkong kalihokan dinhi sa dakbayan sa Sugbo nga mao ang Sinulog 2016 ug ang International Eucharistic Congress nga mahitabo karong bulana.
Si Acting Mayor Edgardo Labella nitahas sa Cebu City Transportation Office ug Department of Public Service nga tutukan ang problema sa trapiko ug basura subay sa kasaulogan sa Sinulog Fiesta 2016 dinhi sa Dakbayan sa Sugbo.
Matud pa ni Atty. Rey Gealon ang pangulo sa CCTO nga 24- oras silang magbantay sa kadalanan para sa Sinulog ug sa International Eucharistic Congress.
Sumala pa ni Gealon, mas nidaghan karon ang mga sakyanan kun itandi sa nanglabay nga katuigan.
Gihangyo niya ang publiko sa pagpasensiya ug konsiderasyon tungod kay ilang gibuhat ang tanan aron mahapsay ang trapiko.
Gipadayag ni Gealon, wala na siyay sakop karon nga gitugotan nga maka-leave ug maka-absent, gani gihangyo pa niya iyang mga sakop nga mo-extend og tagsa ka oras matag adlaw sa ilang naandan nga trabaho.
Ang DPS gitahasan usab ni Labella sa pagsusi kanunay sa mga bul-og sa basura nga posibleng magkatag panahon sa dakong kalihukan.
Subay niining pagpangandam, kinse ka establisemento ang niboluntaryo og pagpangguba diha daplin Salinas Drive, Barangay Lahug kagahapong adlawa.
Kini subay sa nasabotan ni suspended mayor Michael Rama ug nagkalain-lain nga business owners sa niaging tuig alang sa “Kahayag sa Gorordo Restoration.”
Matud ni Kahayag Coordinator Eli Espina nga boluntaryo nga giguba sa mga magpapatigayon sa dapit ang ilang tindahan agi og pagsuporta sa proyekto sa siyudad.
Ang Department of Engineering and Public Works (DEPW) maoy unang moayo sa sidewalk nga tiwason usab sa Department of Public Works and Highways
Gisugdan ang pagpangguba gikan sa templo sa Mormons lahos na sa JY Square.
Hinuon karong adlawa motabang ang Prevention, Restoration, Order, Beautification, Enhancement (PROBE) Team aron mas mapadali ang paghawan na gyud sa mga nahabilin nga strucktura nga wala mahuman gahapon. – /EIM) (BANAT NEWS)