CEBU, Philippines - Nikabat sa 129 ka tawo nga nagpangedaron og usa ka semana ngadto sa 38-anyos ang nakapahimulos sa libre’ng bunyag kagahapon sa hapon sa Archdiocesan Shrine of San Roque, Mambaling nga gipangulohan sa bag-o lang na ordinahan nga Deacon, Rev. Jonathan Rubin.
Sila mapasalamaton nga nahingpit na ang ila’ng pagka-Kristiyanos bisan pipila kanila hingkod na ang pangedaron.
Si Normita Cabriana nipadayag nga daku kaayo niya’ng kalipay nga nagpahigayon og libre’ng pagbunyag ang parokya tungod kay upat niya ka anak nga nagpangedaron og 14, 10 ug 3 ang nabunyagan.
Sumala pa ni Cabriana nga dugay gyud niya’ng napabunyagan ang iya’ng anak tungod sa mga sirkumstansiya nga nasugatan.
Samtang laing nagpabunyag mao ang 31-anyos nga amahan nga nakigdungan na lang usab sa iya’ng unom ka buwan nga anak.
Matud pa ni Franklin Ugbinada nga diha’ng iya’ng nasayran nga adunay libre’ng bunyag iya kini gipahimuslan para sa iya’ng anak ug sa iya mismo tungod kay wala pa man usab siya mabunyagi sa iya’ng ginikanan.
Dugang pa ni Ugbinada nga usa ka daku’ng grasya para sa iya’ng pamilya nga sila nahimo na’ng Kristiyanos tungod sa bunyag ug mao’y sunod niya’ng tinguha ang makompirmahan ug makasal na usab ngadto sa inahan sa iya’ng anak sa umaabot nga panahon.
Samtang gihangop ug gikalipay usab ni Rev. Rubin ang gidaghanon sa mga nitubag sa ila’ng panawagan sulod lang sa usa ka semana sa libre’ng bunyag nga ihatag sa parokya.
Gipadayag ni Rubin nga ang dungan nga bunyag pangandam usab nila sa umaabot nga International Eucharistic Congress tungod kay ang bunyag mao’y una’ng ang-ang sa Eukaristiya.
Gibutyag ni Rubin nga ang parokya usa sa 14 ka parokya nga mopahigayon og Parish Encounter diin mo-host usab sila sa mga delegado gikan sa Hungary. Gipahibawo usab ni Rubin nga nangandam na usab sila karon sa mga kalihukan nga may kalabutan sa IEC diha sa parokya kauban sa kura paruko nga si Fr. Miguelito "Pads Do" Sarmago ug sa Parish Pastoral Council president nga si Ricardo Muaña. (BANAT NEWS)