CEBU, Philippines - Ang University of the Visayas (UV) magsaulog ugmang adlawa sa iyang Founder’s Day dungan sa ika-128 ka tuig nga sumad sa pagkatawo ni Don Vicente Gullas, ang nagtukod sa UV ug maoy una nga presidente sa tunghaan.
Ang usa ka semana nga kalihukan sugdan karong adlawa pinaagi sa usa ka Santos nga Misa alas kuwatro sa hapon nga ipahinungod usab ngadto sa mga Visayanians nga nakaangkon og mga kalampusan. Usa ka mubo ug simple nga musical program ang isunod alang sa tanang Visayanians ug ang kantahon mao ang kinaham nga mga kanta kaniadto ni Don Vicente ug sa UV Co-Founder, ang iyang inspirasyon nga si Inday Pining Rivera-Gullas.
Ang Junior UV Chorale nga gilangkoban sa mga tinun-an sa high school ug sa VIP Gullas Conservatory of Music maoy gitahasan nga moawit sa anniversary song, ang I’m A Fool To Want You, ug pipila pa ka awit nga Sinugboanon.
Ugma sa alas 8 sa buntag, Enero 12, adunay paghalad og mga lab-as nga buwak anha sa Quadrangle sa UV Main Campus. Isunod dayon ang Opening of Exhibit sa Founder.
Pagka alas 6 sa hapon ugma, adunay ipahigayon nga Santos nga Misa adto sa Cebu Memorial Park.
Ang 9th Vicente Gullas Inter-Collegiate Oratorical Contest ipahigayon unya sa Miyerkules. Kining tinuig nga kalihukan pagapangulohan ni Atty. Joseph M. Baduel.
Ang ubang tunghaan nga mosalmot mao ang Southwestern University, Cebu Institute of Technology University, Cebu Doctor’s University, University of the Visayas, University of Cebu, St. Theresa’s College, University of San Jose Recoletos, University of Southern Philippines Foundation ug Cebu Eastern College.
Ang UV College of Education, Arts and Sciences, Criminology ug Computer Studies maoy mga lead departments sa kalihukan karong tuiga. (BANAT NEWS)