CEBU, Philippines – Hapit maputol ang liog ug bukton ug gisapsap pa gyud ang ulo sa usa ka lalaki nga gitigbas sa kapuyo sa iyang pag-umangkon sa miaging hapon samtang kini nag-inom sa Barangay Sacsac sa lungsod sa Dalaguete.
Patay na nga naabtan sa kapolisan si Renato Alega, 62, nga naputos sa samad tinigbasan human gitigbas ni Juvanie Miñoza, 29, taga Carmen, Toledo.
Si Senior Police Officer 3 Cleto Pia, imbestigador, nga nahinabi sa Banat News miingon nga sa pag-abot sa kapolisan patay na ang biktima.
Sumala pa ni Pia nga ang biktima kauban sa iyang mga higala nag-inom og usa ka lapad duol sa iyang balay ug kalit nga miabot ang suspek nga nakainom nang daan.
Matud pa milingkod ang suspek dili layo sa biktima apan pagkataud-taod milanit kini og sundang nga pangbugha sa kahoy ug sa walay daghang estorya gitigbas ang biktima sa makadaghang higayon.
Ang amahan sa kapuyo sa suspek misulay pa unta og uwang kaniya apan wa gyud kini mohunong sa gibuhat ngadto sa biktima maong mikaratel na lang kini og dagan aron mosumbong sa mga otoridad.
“Nakalikay pa man ang biktima ug daling midagan luyo sa ilang balay. Didto siya naabti sa suspek kay dulhugon man ang dalan didto. Walay nabuhat ang iyang mga kuyog tungod man kay may dalang sundang ang suspek,” matud pa ni Pia.
Apan sa pag-abot sa kapolisan nakalayas na ang suspek ug patay na ang biktima nga nabulit sa samad tinigbasan.
Matud pa ni Pia nga midagan sa kakahuyan si Miñoza human sa hitabo ug gilabay ang sundang sa kalibonan nga narekober ra sab sa kapolisan.
Nasayran nga duha ka bulan na ang milabay nagkaaway ang suspek ug ang biktima apan sukad niadto wala na sila nagkabangi pa. (Bryner L. Diaz ug Lorjerist G. Llanto/USJ-R Intern/EIM)(BANAT NEWS)