CEBU, Philippines - Gilugwayan ang oras sa truck ban sa kadalanan sa Dakbayan sa Mandaue gikan sa alas 5 sa hapon hangtud na sa alas 8 sa gabii. Kini ang gipahibawo ni Architect Florentino Nimor, City Planning Officer, human giamendar ang ordinansa nga giduso ni Konsehal Elstone Dabon.
Matud ni Nimor nga giusab ang oras sa truck ban tungod kay ila’ng nakita nga ang volume sa trapik sa siyudad sa alas 7 sa gabii dili pa mokunhod ug ang mga truck ang nakahatag og grabe’ng kahuot sa pipila ka dalan.
Si Nimor niingon nga ang panaghuot sa mga sakyanan sa kadalanan sa dakbayan magpabilin pa gihapon ug molungtad hangtud sa alas 9 sa gabii.
Ang kausaban sa oras gipahinunot usab sa truck ban sa Siyudad sa Sugbo.
Nagkanayon si Nimor nga ang kausaban giuyonan sa mga sakop sa Mandaue Chamber of Commerce and Industry.
Ang truck ban sa buntag ang nagpabilin sa alas 6 hangtud sa alas 8.
Hayan sunod semana hingpit na mapatuman ang bag-ong oras sa truck ban.
Nasayran nga adunay 330,000 ka sakyanan ang moagi sa Mandaue diin katunga mga private vehicles ug taxi, samtang ang laing katunga mga truck ug motorsiklo. (BANAT NEWS)