CEBU, Philippines – Gipatuman na sa Department of Interior and Local Government ang 90 ka adlaw nga suspension order batok ni Konsehal Socrates Fernandez sa Dakbayan sa Talisay.
Si DILG provincial director Jerome Gonzales ang nihatud sa order sa buhatan ni Bise Mayor Romeo Villarante isip mao’y presiding officer sa konseho ug sa buhatan mismo ni Fernandez.
Apan nasayran nga wala dawata ang kamanduan sa buhatan ni Fernandez ug matud pa ilang gitunol ngadto sa abogado niini nga si Atty. George Bragat.
Ang Ombudsman nipagawas og kamanduan ngadto sa DILG nga ipatuman ang 90 ka adlaw nga suspension order ni Fernandez.
Kini may kalabutan sa kaso’ng simple misconduct nga giatubang sa konsehal nga gipirmahan usab ni Ombudsman Conchita Carpio Morales.
Ang kaso ni Fernandez nagsugod dihang siya pa ang mayor sa Dakbayan sa Talisay ug ang iyang sakyanan nadakpan sa kapolisan nga gisakyan sa iyang anak nga si Joavan Fernandez.
Matud pa nga gipugos ni Fernandez pagkuha ang bag sulod sa sakyanan bisan ubos na kini sa kustodiya sa kapolisan.
Ang bag-o nga kamanduan mao’y ikaduha nga pagka-suspenso ni Fernandez sa iyang termino karon sa pagka-konsehal. – /GMR) (BANAT NEWS)