CEBU, Philippines – Kusganong gisaway ni Konsehal Mary Ann delos Santos sila si suspendidong Mayor Michael Rama ug acting Mayor Edgardo Labella.
Kini kay matud niya nga giilad nila ang mga biktima sa sunog sa Sitio Avocado, Barangay Lahug nga unta ang duha pulos man mga abogado apan gituis ang balaud.
Ang pagsaway gipadayag ni delos Santos sa privilege speech atol sa sesyon kagahapon.
Matud ni delos Santos nga ang sayop nila ni Rama ug Labella mao ang pagpalaum sa mga nasunugan nga makatukod pagbalik sa panimalay sa luna nga wala makigsabot sa kadagkuan sa University of the Philippines nga mao’y tag-iya sa luna.
Si UP-Cebu Dean, Atty. Liza Corro, una na nga nipasabot nga dili niya buot papahawaon ang mga biktima apan mas nagkinahanglan ang UP sa luna aron pagtukod sa bag-o nga pasilidad alang sa mga senior high school.
Hinuon nitug-an si Corro nga adunay relocation site alang sa mga dili makabalik sa ilang luna sa Nivel Hills, Busay nga ang luna gipanag-iya sa Probinsiya sa Sugbo.
Tugutan nga temporaryo nga makapuyo ang dili maapektuhan sa pagtukod sa bag-o nga building sa UP kun diin nagkinahanglan og 2,000 square meters aron mapatukod ang proyekto.
Apan si Rama ug Labella nangatarungan nga supak sila nga ang mga informal settlers papahawaon sa dapit nga ilang gipuy-an human sila nabiktima sa sunog.
Nabalaka ang duha ka opisyal sa dakbayan nga kung pasumban, ang mga tag-iya og kayutaan nga gipuy-an og settlers posible nga mopasunog ra sa kabalayan isip paagi nga sila mapalayas.
Ang 57 ka pamilya nga mao’y tag-iya sa panimalay nga nasunog niadtong Disyembre 26 gihatagan na og tag 34 metro kwadrado nga luna sa dapit nga nasunugan human sa re-blocking. – /GMR) (BANAT NEWS)