CEBU, Philippines – Nikurog dayon natumba ang 16-anyos nga lalaki human kini nakuryentehan samtang nangihi sa puthaw nga poste sa suga sulod sa compound sa munisipyo sa Lungsod sa Borbon pasado alas 10 sa nakalabay nga gabii.
Giila ang biktima nga si Edan Hortezuela, nagpuyo sa Barangay Cadaruhan sa mao’ng lungsod. Sumala pa ni Senior Police Officer 2 Richeleu Artista sa Borbon Police Station nga nahinabi sa Banat News nga naabot sa mao’ng dapit ang biktima kay dunay liga sa basketball sa sports complex sa Poblacion.
Apan diha’ng nangihi ang biktima sa poste wala nabantayi nga grounded diay.
Sumala pa sa mga nakakita nga kalit lang nikirig ang biktima ug gitabang sa mga tawo ug gidala sa Juan Dosado Memorial Hospital sa Lungsod sa Sogod.
Hinuon ang batan-on luwas na sa delikado’ng kahimtang. Si Artista niingon nga posible’ng gumikan sa pag-uwan-uwan niadto’ng higayuna ang nakapa-grounded sa poste.
Gipaayo na sa kagamhanan sa lungsod ang poste aron wala na’y laing makuryentahan. – /GMR) (BANAT NEWS)