CEBU, Philippines – Patay ang usa ka lalaki human gipusil sa wala mailhi’ng tawo sa Sitio Kapaping, Basak, Dakbayan sa Lapu-Lapu sa niagi’ng Lunes sa gabii.
Nakaangkon og samad sa agtang ang biktima nga si Alejandro Capilitan Jr., freelance civil engineer ug residente sa Deca Homes sa mao’ng lugar.
Sa wala pa nahitabo ang pagpusil, si Capilitan naglakaw sa karsada padulong sa usa ka mall, matud ni PO2 Jerson Alparito, imbestigador sa Lapu-Lapu City Police Office-Homicide Section.
Dugang ni Alparito nga usa ka lalaki ang kalit nga niduol sa biktima ug gipusil sa wala’y pagduha-duha.
Ang mga nakasaksi nagkanayon nga daling niikyas ang namusil sakay sa motorsiklo nga nagpaabot duol sa mall.
Nakuha sa kapolisan sa crime scene ang usa ka kabhang gikan sa .45 caliber pistol.
Na-recover sa kapolisan ang duha ka cellphone nga gipanag-iya sa biktima ilabi na ang usa ka itom nga bag niini nga gisudlan og check book ug brown wallet nga adunay mga identification cards.
Dugang ni Alparito nga ila’ng naistorya ang pamilya sa biktima apan sila mismo nahibung kung ngano’ng gipatay si Capilitan sanglit wala kini kontra. – /GMR) (BANAT NEWS)