CEBU, Philippines – Patay ang usa ka negosyante dihang gipusil sa wala mailhing tawo usa ka oras ang nakalabay sa Bag-ong Tuig samtang siya nag-inom uban ang iyang helper sa ilang sala sa Barangay Nalhub, Dalaguete.
Ang napusilan patay naila nga si Paterno “Toming” Belandres Amancio, nga usa ka negosyante og utanon.
Base sa imbestigasyon sa kapolisan nga si Toming ug ang iyang helper nga si Bienvenido Pial maayo pang paglingaw-lingaw atol sa pagsugat sa Bag-ong Tuig dihang kalit gipaulanan og bala si Amancio.
Walay nakakita kun si kinsa ang nipusil sa biktima apan gituohan nga gikan sa gawas ang mamumuno ug gipalusot lang sa bintana ang bala.
Nakuha sa crime scene ang mga basiyo sa bala sa .9mm nga gituohan gikan sa armas sa mamumuno. Ang mga residente nakabantay nga human sa butobuto sa armas, nakadungog sila og duha ka motorsiklo nga daling mipasirit gikan sa balay sa biktima.
Dali pa unta kining gidala sa tambalanan apan nakabsan kini sa kinabuhi. Gisusi pa sa kapolisan kun unsay motibo sa maong pagpatay.
Samtang sa Dakbayan sa Lapu-Lapu, usa ka Edwin Carsillas, 37, ang gipusil patay sa wa mailhing tawo diha sa Brgy. Buaya 30-minutos human sa pagsud sa tuig 2016 apan padayon pa ang butobuto sa mga pabuto sa lugar.
Matud pa ni PO3 Joseph Rouel Cutanda, imbestigador sa LCPO- Homicide Section bag-o pang nakagawas sa Lapu-Lapu City Jail ang biktima.
Ang biktima naglakaw sa maong dapit ug kalit kining gipusil samtang nagpaka-paka pa ang buto sa mga pabuto. Nakaangkon og samad pinusilan si Carsillas sa walang bahin sa ulo, ibabaw nga bahin sa dunggan nga nilusot sa tuong bahin sa aping niini.
Padayon pa karon ang kapolisan sa pagsusi sa maong duha ka pagpamusil. (Bryner L. Diaz ug Christell Fatima Tudtud/EIM) (BANAT NEWS)