CEBU, Philippines – Ang mga tax collectors sa dakbayan sa Sugbo magsugod na ugmang adlawa pagpanawat og bayad alang sa business taxes adto sa gimugna nila nga “One Stop Shop” sa SM Trade Hall.
Sanglit nalangay man sila pagsugod sa pagpangolekta og business taxes para karong tuiga, si City Treasurer Diwa Cuevas misugyot ngadto sa Cebu City Council nga ang termino lugwayan gikan sa Enero 4 ngadto sa Enero 27.
Ang Local Government Code naglatid nga ang pagpangolekta og business taxes kinahanglang bayaran gikan sa unang adlaw sa Enero hangtod sa Enero 20. Kun ang pagbayad himuon nga lapas na sa maong petsa, duna nay multa.
Apan si Treasurer Cuevas miingon nga angay’ng lugwayan ang termino tungod kay dugay kaayo nga nakasugod karon pagpangolekta og buhis tungod sa daghang mga holiday.
Malaumon si Cuevas nga dili siya balibaran sa City Council sa iyang tinguha aron kahatagan og katumanan ang iyang gilantaw nga target collection nga P1.5 Bilyones gikan lang sa business tax.
Tungod sa nagkadaghan na nga mga balay-patigayon nga mi-operate dinhi sa dakbayan sa Sugbo, napanglantawan ni Cuevas nga mosaka gyud ang P1 bilyon nga collection sa tuig 2015. (BANAT NEWS)