CEBU, Philippines - Gihugupan kagahapon sa baga’ng duot sa katawhan ang Fruit Festival sa Carbon Public Market gumikan sa tradisyon sa paghalad og lingin nga prutas sa pagsugat sa Bag-ong Tuig.
Sa pagsubay sa Banat News kagahapon sa Carbon, aduna gyu’y pagsaka sa presyo sa lingin nga mga prutas itandi sa ordinaryo nga adlaw.
Matud ni Ada Ablecat, usa sa mga mamalitay, nga bisan mahal mapugos lang gyud siya nga mopalit kay ka usa ra kini sa usa ka tuig ug pasalamat lang sab niya sa mga grasya nga nadawat.
Sumala pa ni Ablecat nga tradisyon na gyud sa ila’ng pamilya ang maghalad og mga prutas.
"Wala’y mawala man kung ako lang ipadayon ang gisugdan sa ako’ng mga katigulangan," matud niya.
Samtang atol sa pagdagsa sa mga tawo, ang Carbon Police Station wala’y natala nga mga mangomprahay nga biktima sa panguot matud ni Senior Police Officer 1 Achilles Sanchez Jr. (BANAT NEWS)