CEBU, Philippines – Dugang unom ka mga SM MyBus ang giaprubahan og prangkisa sa Land Transportation Franchising and Regulatory Board-7 aron matubag ang kakuwang sa mga masakyan sa katawhan sa bag-ohay lang gihimong developmental route niini.
Sumala pa ni LTFRB-7 regional director Rey Elnar kini nga mga dugang nga MyBus nagbiyahe gikan sa Talisay City padung sa SM Seaside City subay sa South Road Properties sa Cebu City.
Tungod sa maong dugang unom ka mga bus, nahimo na siya siyam ka MyBus ang nagbiyahe karon sa maong rota.
Ang Metro Rapid Transit System Inc., nga usa ka joint venture sa SM Holdings Inc. ug JamTransport mao ang nag- operate sa MyBus.
Ang MRTSI aduna pay pending franchise applications sa LTFRB-7 alang sa pag-operate niini og 77 units ka mga bus nga gikonsiderar nga high quality premium buses ubos sa High Quality Public Transport System.
Daghang mga transport groups sa Sugbo ang nisupak sa pagsud sa 77 units nga bus kay matud pa nila makapasamot kini sa problema sa trapiko sa siyudad.
Ang mga misupak niini naglakip sa Cebu Integrated Transport Service Multi-Purpose Cooperative, Visayas United Drivers Transport and Allied Services Cooperative, Metro Cebu Taxi Operators Association, Cebu Provincial Bus Operators Association, Cebu South Mini Bus Operators Association ug ang National Confederation of Transportworkers Union-Central Visayas.
Gipahibalo ni Elnar nga adunay dugang lima ka MyBus nga aduna nay prangkisa sa pagbiyahe sa Batangas ngadto sa Manila ang gihatagan og special permit ni LTFRB chairman Winston Gines nga nag-operate gikan SM City Cebu padung sa Mactan Airport.
Ang special permits balido lang kutob Marso 2016 apan ang biyahe sa SM City Cebu padung sa MCIA kutob na lang ugmang adlawa. – /EIM) (BANAT NEWS)