CEBU, Philippines – Giawhag ni Acting Cebu City Mayor Edgardo Labella ang kadagkoan sa University of the Philippines (UV) nga dili babagan ang mga biktima sa sunog diha sa Sitio Avocado sa Lahug nga makatukod sila pagbalik og ilang panimalay.
Ang awhag ni Labella gihimo tungod kay ang kadagkoan sa UP mipahibalo nga gamiton nila ang luna nga nasunogan sa panimalay sa 175 ka pamilya nga pagka karon anaa pa temporaryong nag-estar sa Lahug Elementary School.
Gipaspasan karon sa kadagkoan sa City Hall ang paghawan sa dapit nga nasunogan aron makasugod na ang pag-reblock sa dapit ug kabutangan kini og karsada, ingon man mabahin pag-ayo ang luna. Ang dapit nga nasunogan yuta kini kaniadto sa Kapitolyo ug gidonar ngadto sa UP aron katukoran og tunghaan, apan tungod sa kalapad sa maong luna wala nila kini malukop sa pagtukod og building. Kini maoy hinungdan nga ang mga squatters migamit niini pinaagi sa pagtukod og ilang panimalay.
Matud ni Labella ang isyu sa pagpanag-iya sa UP sa maong yuta mahimong hisgotan lang unya apan dili tukma nga gamiton nila ang sunog aron hikawan nila ang mga nasunogan sa pagtukod pagbalik og ilang kabalayan.
Gusto ni Labella nga ang kadagkoan sa UP ug ang dakbayan sa Sugbo, apil ang mga representante sa mga lumolupyo magtagbo unya aron nga hisgotan ang maong isyu.
Ang Division for the Welfare of Urban Poor (DWUP) wala pa makapaniguro kun ang tanang mga pamilya nga nasunogan makabalik ba sa pagtukod og panimalay sa Sitio Avocado human sa ipahigayong reblocking.
Ang kadagkoan sa City Hall nanghatag kagahapon og tag P10 mil nga financial assistance sa mga pamilya nga nasunogan nga nanag-iya gyud og panimalay, samtang tag P5 mil sa mga nag-abang lang. (BANAT NEWS)